75 Jahre Frauenriege
Vil Gedanke – vil Idee – einigi Sitzige sind eusere Jubiläumsfiir vom 7.7.07 vorusgange.
Gwüsst hämmer, dass im Jahr 1932 es Grüppli Fraue eusi Fraueriege gründet hät. Das Grüppli isch gwachse und über Jahre ghegt und pflägt worde. Drum hämmer au öppis Bsunders für euses Jubiläum welle. Und da isch doch de Wunsch vonere neue Fahne die beschti Glägeheit gsi. E Fahneweih – das isch es ! D’Marianne hät sich voller Begeischterig a d’Arbet gmacht und s’Resultat isch e wunderschöni Fahne – e Fahne, wo sich so richtig schwinge laat. Ich denke, alli, wo d’Marianne gseh händ, wie sie gschtrahled hät, teiled d’Meinig, dass es halt scho schön isch, mit so nere Fahne mitlaufe z’chönne. Bi dere Glägeheit möchte mir nomol allne Spänder ganz härzlich danke. En spezielle Dank au em TV, wo euse Fahnegötti isch.
Euses Fäscht isch dänn wiiter gange mit eme feine Znacht im Biz und Beiz. Eusi Präsidentin hät e Delegation vom TV, vo de Dameriege, vo dä Männerriege und de Veterane dörfe begrüesse. Au e Verträtig vom Fraueverein, dä Sohn vom e Gründigsmitglied, dä Hans Ulrich Graf, euse Stadtpräsident und no vili meh händ a eusem Fäscht teilgnoh.
Dänn, zwüsche Esse und Dessert händ eusi Fraue e chliises Unterhaltigsprogramm vorgfüert.
Au eusi Unterhalteri, d’hät eus mit Anekdote vo de Frauriege, em Vorschtelle vo de Vorschtandsfraue und anderi luschtige Gschichtli beschtens unterhalte.
Turnen in alten Zeiten !
Mit Aschprache und Gschänk vo eusne Gäscht isch dä Abig wiitergange.
Langsam aber sicher isch euses Fäscht am Änd zue gange.
A dere Schtell möchte mer nomol allne danke: em OK – Lotti, Vreni, Thérèse und Manuela, dä Turnerinne, wo am Unterhaltigsprogramm mitgmacht händ, allne Schpänder, am Chef vom Bitz und Beiz und allne, wo mithälfed und mitträged, dass es eusere Frauriege so guet gaht, sigs als Leiteri, als Vorschtandsmitglied oder eifach wänns öppis zhälfe git.
Ohne eu hettet mer kei e so schöns Fäscht dörfe fiire. Jetzt freued mer eus no uf eusi Jubiläumsreis am 15. September.
